mechatroniker
ميكاترونيك
الشهادات اللازمة:
صورة عن شهادة التاسع.
المدة:
٣ ونص سنوات.
عبارة عن دوام بالمدرسة وعمل مدفوع شهريا حوالي من 830-930€ شهريا بأول السنة ويرتفع كل سنة حتى انتهاء الدراسة.
لمعرفة مزيد من معلومات وتقدم إلى هذه المهنة من خلال هذا الموقع :
www.ausbildung.de/berufe/mechatroniker
تجربة احد الأشخاص في هذه المهنة
السلام عليكم ورحمة الله
حابب اشرحلكم عن تجربتي بكل التفاصيل للحصول على تدريب مهني( Mechatroniker )في المانيا وتحديداً ببرلين
بالبداية حكيت مع أدارة الهايم لياخدولي موعد من وكالة العمل ( Agentur für Arbeit )
من قبل ما اخد الاقامة وتم ترتيب موعد باللغة الانجليزية لان كان في خيار بين الألماني او الانجليزي المهم رحت على الموعد واستقبلني الموظف برحابة صدر طبعا كان طالب مني سيرة ذاتية ببوست الموعد اللي اجاني
( بس انا وقتها ما كتبتها ) صار الموظف يسالني عن دراستي وشو اشتغلت بكل التفاصيل والتواريخ والمدة، وضلينا سؤال وجواب شي ساعتين وكان كل المعلومات يخزنها عالكمبيوتر
وبعدها أتشكرني وخبرني انو بأقرب فرصة بيبعتلي موعد ثاني . بعد أسبوع أجاني الموعد عند موظف تاني وكان في عندو فرصة براكتيكم بشركة مياه برلين
( Berliner Wasserbetriebe ) مدة البراكتيكم 8 شهور من تاريخ 04.01.2016 الى تاريخ 30.08.2016 وكان باقي شهرين لبداية البراكتيكم ،
المهم انأ وافقت على العرض وطلب مني الموظف انو انتظر موعد المقابلة مع إدارة الشركة .
تفاصيل عرض البراكتيكوم كانت كالآتي :
_ براكتيكم ماجور 216 €مع تكت مواصلات عامة شهرياً مدة 8 شهور
_ فرصة الحصول على مقعد تدريب مهني(Ausbildung ) في نفس الشركة أذا تم اجتياز امتحان القبول بنجاح
المهن هي – ميكاترونيك – الكتروني – كهرباء – مكانيك – رسم هندسي – لحام – IT – مختص أنابيب
_ اول اربع شهور دراسة عملية بكل الأقسام الموجودة تقريبا لحتى تختار دراسة وما تندم عليها بعدين
_ تاني أربع شهور شغل عملي بالشركة بأحد الأقسام
عملت المقابلة والحمد لله تم اختياري علما انو كان مستوى لغتي ءA1
وبلشنا البراكتيكم وتفاجئت انو اول اسبوعين كانت فحص عام بكلشي رياضيات فيزيا كيميا رسم صناعي الماني وحتى انكليزي وهاد الشي ما كنت حاسب حسابو ابدا بس الحمد لله كمان أنجحت,
كنا غروب مؤلف من 16 شخص تم اختيار 12 شخص ، كان معي شب سوري بس رفضوه بعد هالاسبوعين ( وكتير زعلت عليه ) بعدين بقيت انا وشخص مصري وأفغاني وباكستاني والباقي ألمان
بعد مرور 6 شهور بالبراكتيكم عملنا فحص التأهل على التدريب المهني والحمد لله كنت من المتأهلين على الميكاترونيك لان فعلا دراسة كتير بحبها بس كتييييييير صعبة
وبلشت اوسبيلدونغ بتاريخ 01.09.2016 اول اسبوع عملولنا معسكر كان كتير حلووووو?
تفاصيل التدريب المهني كالآتي :
_ تدريب مهني لمدة 3 سنين ونص ماجور 880 € اول سنة وكل سنة بزيد شي خمسين + المواصلات الشهرية طول فترة الدراسة
_ اجازة سنوية ماجورة مدة 30 يوم عمل
_ دوام اسبوعين في الشركة واسبوع بالمدرسة ( #Berufsschule )
_ فرصة العمل في الشركة بعد التخرج اذا كان المجموع جيد
وهلئ بدي اشرح عن الميكاترونيك (Mechatroniker ) هالاختصاص فيه
ميكانيك وكهربا والكترون وبالنظري- فيزياء – كيماء -رياضيات – رسم صناعي – علم مواد – ميكانيك الات – لوحات تحكم – حصص كمبيوتر – انجليزي – سياسة ( متل القومية عنا )
ورياضة كمان هي احلى شي. بس طبعا هالاختصاص بعيد كتير وما الو علاقة بميكانيك السيارات ، اختصاص كتير حلو ومميز
بالنسبة للدوام 8 ساعات باليوم والسبت والاحد عطلة ،
فوائد الاوسبيلدونغ بالنسبة الي كانت كتيرة واهم شي انو عقد الاوسبيلدنغ كان هو سبب رئيسي لحصولي على اقامة 3 سنين بوقت كان كل العالم ياخدو سنة وحصولي على سكن
عن طريق الشركة بشكل سريع ومريح وبدون تعقيد وانشالله عقبال كل شخص مجّد ومكافح
واخرشي حابب احكي عن صعوبات هالاختصاص من وجهة نظري ، من الجهة العملية لازم يكون عندك القدرة على التعامل مع الالات الكبيرة والتركيز كتير كمان ،
فهم نصوص التمارين العملية باللغة الالمانية اللي بتكون معقدة احيانا حتى على الالمان ومن الجهة النظرية فيها مسائل فيزياء كتير عن الحركة والطاقة يعني بدها دراسة
وتركيز كتير وطبعا من ناحية اللغة مصطلحات صناعية كتير صعبة بس كلشي مع الدراسة بصير سهل
والشي الحلو بهالاختصاص انو كتير ممتع وعطول في اشياء جديدة بتتعلمها وابدا ما بتحس بالملل خلال مدة الدراسة ، وفرص العمل كتير متوفرة وفيك بعد اكمال التدريب متابعة الدراسة في الجامعات.
